జై తెలంగాణ..! అపురూప చ‌రిత్ర‌కు ఏడేళ్లు..

చీకట్లను చీల్చుకుంటూ.. తెలంగాణ రాష్ట్రం ఆవిర్భ‌వించి ఏడు వ‌సంతాలైంది..! ఆరు ద‌శాబ్దాల పోరాట కాలంలో ఎన్నో భావోద్వేగాలు.. దిక్కులు పిక్కటిల్లేలా నినదించిన ‘జై తెలంగాణ’ ఆవాజ్‌, అమరుల బలిదానాల్లో ఆరిపోయిన ప్రాణాలు, కష్టాల నడుమ, గాయాల నడుమ, వొడితిరుగుతున్న కడుపుకోతలు, లక్షల గొంతులు చించుకోని ఎగిసిపడ్డ నినాదాలు, బిగుసుకున్న పిడికిల్లు, కుట్రల్ని కుటిలాల్ని ఎప్పటికప్పుడు ఎదిరించిన వ్యూహాలు, ఉద్వేగాలు, ఉద్రేకాలు, అక్షరాలు, ఆటపాటలు, కోటి ఆరాటాలు ఒక్కటై ఒక ఆధిపత్యాన్ని గెలిచినయి. ప్రతి ఒక్కరికీ చరిత్రలో పాత్ర, విజయంలో భాగం కల్పించిన ఉద్యమం తెలంగాణ ఉద్యమమొక్కటే. మన కాలపు చరిత్ర, మన కండ్ల ముందటి విజయం. తెలంగాణ ప్ర‌జ‌ల కండ్ల‌ల్ల వెలుగు నిండింది. ప్రపంచ ప్రజా ఉద్యమాల సరసన తెలంగాణ ఉద్యమాన్ని నిలిపిన అసలు సిసలు ప్రజా విప్లవం..